आज: | Thu, 21, Nov, 2024
१७४७ पाठक संख्या
पोखरा – पोखरा अन्तर्राष्ट्रिय विमानस्थलमा आज पहिलो पटक अन्तर्राष्ट्रिय उडानका रुपमा सिचुआन एयरको विमान अवतरण गरेको छ ।
चीनको छेन्दु–तियान्फु अन्तर्राष्ट्रिय विमानस्थलबाट चार्टर्ड उडान भरेको विमान आज बिहान ९:०५ मा पोखरा विमानस्थलमा अवतरण गरेको हो ।
एयरबस कम्पनीको ए३१९ मोडलको उक्त विमानमा १ सय ३० यात्रु रहेको जनाइएको छ । १ जनवरी २०२३ बाट सञ्चालनमा आएको पोखरा विमानस्थलमा यस अघिनै हिमालय एयरलाइन्सको त्यो भन्दा ठूलो एयरबस ए ३२० मोडलको विमानले सफल परीक्षण उडान गरिसकेको थियो ।
पोखराको फेवातालमा यही असार ८ र ९ गते आयोजना हुन लागेको नेपाल चाइना ड्रागन बोट रेस फेस्टिभलमा सहभागी हुने खेलाडीसहितका यात्रु लिएर आएको हो ।
यही जहाजमा चीन भ्रमणबाट फर्किएका राष्ट्रिय सभाका अध्यक्ष गणेशप्रसाद तिमिल्सिना,सांसदहरू प्रदीप यादव, धवलशम्शेर जबरा, दीपा गुरुङ, उदयबहादुर बोहरा, हरिशंकर चौधरी र जीवन परियार सहितको नेपाली प्रतिनिधिमण्डल समेत छ ।
उनीहरुलाई पर्यटनमन्त्री सुदन किराती लगायतले स्वागत गरेका छन् ।
यो जहाज करिब दुई घण्टा पोखरा विमानस्थलमा रहेर बिहान ११ बजे काठमाडौं हुँदै चीन फर्किने छ ।
