आज: | Thu, 21, Nov, 2024
२०२९ पाठक संख्या
कास्की – पोखराकै व्यस्त सडक पृथ्वीचोक–चाइनापुलसम्म पार्किङ निषेध गरिने भएको छ । जिल्ला सुरक्षा समिति कास्कीको बैठकले आइतबारबाट पृथ्वीचोकदेखि चाइनपुलसम्म सडकको दुवैतर्फ पार्किङ निषेध गर्ने निर्णय गरेको हो ।
उक्त क्षेत्रको पार्किङ व्यवस्थापन गर्ने र त्यसका लागि महानगरलाई अनुरोध गर्ने जिल्ला सुरक्षा समिति कास्कीको बैठकले निर्णय गरेको कास्कीका प्रमुख जिल्ला अधिकारी गुरुदत्त ढकालले जानकारी दिए ।
महानगरले शुक्रवार र शनिवार माइकिङ गरी सडकको दुवैतर्फ रहेका राखिएका गाडी हटाउन, मापदण्ड विपरीत बनाइएका संरचना भत्काउन अनुरोध गरेको छ ।
हालसम्म लामा तथा छोटा दुरीका सवारी साधन बाटो छेउमै रोकिँदै आइरहेको छ । पोखरा आउने र पोखरा बाहिर जाने लामो दूरीका बसहरुपनि सडकमै यात्रु पर्खिने, चढाउने र ओराल्ने गर्दै आएका थिए ।
महानगर यातायात व्यवस्थापन समिति संयोजक अमृत तिमिल्सिनाले सो क्षेत्रको सडक व्यवस्थापनका लागि शुक्रवारबाट काम थालिएको बताए । स्थानीय सार्वजनिक सवारीलाई पिक एन्ड ड्रपमात्र गर्न दिइने उनको भनाइ छ ।
सो क्षेत्रमा पोखरा प्रवेश गर्ने र ओलर्नेहरुको जमघट त हुन्छ नै तरकारीको होलसेल, सस्तो बजार, संघ, संस्थाका कार्यालय र व्यापारिक मेलासमेत हुने गरेको छ ।
एकातर्फ साँघुरो चाइना पुल र अर्कोतर्फ सडकमै सवारी साधन पार्किङ हुँदा पृथ्वीचोक–चाइनापुल व्यवस्थित बन्न सकेको थिएन । साथै उक्त क्षेत्रमा बारम्बार ट्राफिक जाम पनि हुने गरेको पाइन्छ ।
आइतबारबाटै सो क्षेत्रमा पार्किङ व्यवस्थापन सुरु गरिने ट्राफिक कार्यालय कास्की प्रमुख कृष्णबहादुर चन्दले बताए ।
पोखरा महानगरपालिकाका मेयर धनराज आचार्यले पृथ्वीचोकदेखि चाइनापुलभित्रको सडकमा आइतबारदेखि कुनै खालका गाडी पनि पार्किङ गर्न नदिइने बताए ।
‘उक्त क्षेत्रमा ड्राइभरबिनाका कुनै गाडी सडकमा पार्किङ गर्न हुदैँनन् । जिल्ला सुरक्षा समितिले गरेको निर्णय हो । स्थानीय सरकारले दायित्व निर्वाह गर्ने हो,’ उनले भने, ‘सोझा अर्थ के हो भने अब बाटोलाई नै बसपार्क बनाउन पाइने छैन, बसपार्कमै पुग्नुपर्छ ।’
