आज: | Thu, 21, Nov, 2024
७३९ पाठक संख्या
प्रेरणा नेपाल
बुटवल । लुम्बिनी प्रादेशिक अस्पताल मेडिकल सुपरिटेण्डेन्टबिहीन हुँदा दैनिक कामकारबाहीमामा असर परेको छ। करिब ११० वर्ष पुरानो अस्पतालले दैनिक हजारौं बिरामीलाई सेवा दिँदै आएको छ।
आठ सयभन्दा बढी कर्मचारी रहेको अस्पताल अहिले नेतृत्वबिहीन हुँदा आर्थिक तथा प्रशासनिक कामका साथै सेवा प्रवाहमा असर पर्न थालेको छ।
प्रदेशको १२ वटा जिल्लालाई प्रतिनिधित्व गरेको अस्पताल राजनीतिबाट अछुतो रहन सकेन। यो जनताको जनसरोकारसँग गाँसिएको विषय हो। केन्द्रदेखि प्रदेश र स्थानीय तहसम्म राजनीतिले सबै क्षेत्र गिजोलिएकोमा त्यसबाट स्वास्थ्य क्षेत्र पनि अछुतो रहन सकेको छैन।
अस्पतालमा यही जेठ १८ गते लुम्बिनी प्रदेश सरकारको निणर्यबाट १०औं तहका डा. इन्द्र ढकाललाई मेसु नियुक्त गर्यो। अस्पतालमै कार्यरत अर्का डा. विष्णु गौतमले आफू ११औं तहको हुँदाहुँदै १०औं तहकोलाई मेसु नियुक्त गरिएको भन्दै सर्वोच्च पुगे। सर्वोच्चले अल्पकालीन अन्तरिम आदेश जारी गर्दै मुद्दाको अन्तिम टुंगो नलागेसम्म मेसुको काम कारबाहीमा रोक लगाउँदै यथास्थितिमा राख्न भनेको छ।
सर्वोच्चले गरेको निर्णयले जनाताको स्वास्थ्य, पाउनुपर्ने सेवा सुविधा प्रभावित भएको लुम्बिनी प्रादेशिक अस्पतालका अध्यक्ष अजयमान श्रेष्ठले बताए।
स्वास्थ्य जस्तो संवेदनशिल विषयमा एउटा सकारले गरेको निर्णयलाई अर्को सरकारले मिच्दै जाँदा न्यायसंगत नभएको पनि अध्यक्ष श्रेष्ठको भनाई छ।
अध्यक्ष भन्छन्, ‘व्यवस्थापन समितिलाई राम्रोसँग चलायमान गराउने हो भने उहाँहरूको कार्यकाल पूरा गर्न दिनुपर्छ। जनतासँग जोडिएको संवेदनशील विषयमा खेलवाड नगर्न मेरो आग्रह छ।’
यसैगरी तत्काल दैनिक काम नरोक्नेगरी मन्त्रीस्तरीय निणर्यबाट मन्त्रालयका स्वास्थ्य निर्देशक डा. विनोद गिरीलाई थप जिम्मेवारी दिइएको छ।
अस्पतालमा संघ सरकारले पनि ठूलो लगानी गरेको छ। अर्बौको परियोजना सञ्चालनमा रहेको छ।
डा. गिरी भन्छन्, ‘अस्पताल अहिले साँघुरो अवस्थामा छ। अस्पतालको नयाँ भवन निर्माण गर्ने क्रममा छौं। पुरानै भवनबाट सेवा दिँदैगर्दा बढी नै घुइचो देखिरहेको छ। त्यसको तत्काल हामी समाधान देख्दैनौं।’
बिरामीको चाँप राम्रो कामको परिणाम भएको उनको भनाइ छ। बिहान ७ बजेदेखि बेलुकी ५–६ बजे सम्म अस्पतालका डाक्टर बिरामीलाई सेवा दिन तल्लिन हुने गरेको उनले बताए। अस्पताललाई थप राम्रो बनाउँदै लगिने अध्यक्ष श्रेष्ठको भनाइ छ।
