जिबी राईको पासपोर्ट रद्द गर्न अदालतको आदेश

पोखरा – सहकारीको रकम हिनामिन गरेर फरार गितेन्द्रबाबु राई (जिबी) को पासपोर्ट रद्द गर्ने आदेश जिल्ला अदालत कास्कीले जारी गरेको छ। न्यायाधीश हिमलाल बेलबासेको इजलासले शुक्रबार पासपोर्ट रद्द गर्ने निर्णय राहदानी विभागलाई पठाउन आदेश दिएको हो।

जिबी राई सूर्यदर्शन बचत तथा ऋण सहकारीको रकम हिनामिनाका मुख्य योजनाकार मानिएका छन्। सहकारीको १८ हजार ७ सय सदस्यहरूको एक अर्ब ५१ करोड ४० लाख १९ हजार १९४ रुपैयाँ अपचलन गरेको आरोप छ। गतवर्षको असोज १८ गते कास्कीका सरकारी वकिलको कार्यालयले १९ जनाविरुद्ध मुद्दा दर्ता गरेको थियो, जसमा जिबी राई समेत सामेल छन्।

त्यसपछि, पुस महिनामा थप अभियोग दर्ता गरिएको छ। पूर्वगृहमन्त्री रवि लामिछाने, पूर्वडिआईजी छविलाल जोशी लगायत ४४ जनाविरुद्ध पनि अनुसन्धान अघि बढेको छ। पुस २५ गते अदालतले रविसहित सात जनालाई धरौटीमा रिहा गर्ने आदेश दिएको छ।