आज: | Fri, 09, May, 2025
८५ पाठक संख्या
काठमाडौं, २६ वैशाख। भारत र पाकिस्तानबीच जारी तनावबारे अमेरिकाले दुवै देशले एकअर्कामाथि आक्रमण गर्न बन्द गर्नुपर्ने बताएको छ । आक्रमणले कुनै समाधान नदिने अमेरिकाको भनाइ छ ।
अमेरिकी विदेश मन्त्रालयका प्रवक्ता ट्यामी ब्रुसले पत्रकार सम्मेलनमा आक्रमण बन्द गर्न आग्रह गरिन् ।
पत्रकारको प्रश्नको जवाफमा ब्रुसले भने, “अमेरिकाको सन्देश हिंसा, सैन्य कारबाही र युद्ध बन्द हुनुपर्छ भन्ने हो । मध्यपूर्वमा युद्धबाट कुनै पनि समाधान निस्कँदैन भन्ने प्रमाणित भइसकेको छ ।”
उनले युद्ध, सेना र हिंसा समाधान नभएको प्रष्ट पारेका छन् । हिंसा र समस्याहरूलाई रोक्ने एक मात्र समाधान नयाँ विचार र कूटनीति भएको उनको भनाइ छ ।
अमेरिकी हस्तक्षेपबारे उनले के भने ?
भारत र पाकिस्तानबीच मध्यस्थताको प्रश्नमा ट्यामी ब्रुसले भने, “जब सम्बन्धित देशका नेताहरू कूटनीतिक वा कुनै पनि स्तरमा कुरा गरिरहेका हुन्छन्, हामी यसको जानकारी साझा गर्दैनौँ । यो हाम्रो नीति हो ।”
नेताहरूले व्यक्तिगतस्तरमा छलफल गरिरहेका बेला सञ्चारमाध्यमहरूलाई जानकारी दिन नहुने उनले प्रष्ट पारेका छन् । ब्रुसले भारत र पाकिस्तानबीच कुनै पनि प्रकारको मध्यस्थताको संकेत गरेनन् । तर, यो सम्भावनाको अस्वीकार पनि गरेनन् ।
अमेरिकी विदेश मन्त्रालयका प्रवक्ताले अमेरिकी विदेशमन्त्री मार्को रुबियोले भारतीय विदेशमन्त्री एस जयशंकर र पाकिस्तानी प्रधानमन्त्री शाहबाज शरिफसँग फोनमा कुराकानी गरेको पनि बताए ।
रुबियोले दुवै देशका नेताहरूलाई तनाव कम गर्न र हिंसा रोक्न आग्रह गरे । उनले प्रत्यक्ष वार्तामा पनि जोड दिएका छन् । बीबीसी
