आज: | Sat, 04, May, 2024
२३४१ पाठक संख्या
काठमाडौं – नेपाली सेनाको ‘साइबर स्पेस’ मा अनधिकृत पहुँच पुर्याएको आरोपमा एकजना पक्राउ परेका छन् । पक्राउ पर्नेमा स्याङ्जाको वालिङ नगरपालिका-१० घर भई पोखरा-१६ बाटुलेचौरमा बस्दै आएका २१ वर्षीय सागर ढकाल छन् । नेपाल प्रहरीको केन्द्रीय साइबर ब्यूरोले शुक्रबार उनलाई पक्राउ गरेको हो । उनी पश्चिमाञ्चल इञ्जिनियरिङ कलेजमा स्नातक तेस्रो वर्ष अध्ययरत विद्यार्थी हुन् ।
बाटुलेचौरमा डेरा बस्ने उनले घरधनीको इन्टरनेट प्रयोग गरेर सेनाको सर्भरमा अनधिकृत पहुँच पुर्याएको पाइएको नेपाल प्रहरीको साइबर ब्यूरोका प्रहरी वरिष्ठ उपरीक्षक (एसएसपी) नविन्द अर्यालले जानकारी दिए ।
नेपाली सेनाको पत्रपछि ब्युरोले अनुसन्धान अगाडि बढाएको थियो । प्रहरीका अनुसार ढकालले सेनाको साइबर स्पेसमा अनाधिकृत पहुँच राख्ने हिसाबले बारम्बार अट्याक गरेका थिए ।
प्रहरीका अनुसार पक्राउ परेका ढकालले सेनाको के के विवरणमा पहुँच पुर्याए भन्ने खुलेको छैन उनले के प्रयोजनका लागि सेनाको सर्भर ह्याक गरे भन्ने पनि खुलेको छैन । यसबारे विस्तृत अनुसन्धान बल्ल सुरु भएको एसएसपी अर्यालले बताए ।
