FLASH NEWS

दुर्घटनाग्रस्त बसमा आगलागी हुँदा २५ यात्रुको मृत्यु


नेपाल आवाज १६ असार २०८०, शनिबार ०९:११ मा प्रकाशित १६३३ पाठक संख्या

मुम्बई – भारतको महाराष्ट्रमा शुक्रवार राति एउटा भयानक दुर्घटना भएको छ। यवतमालबाट पुणे जाँदै गरेको बस बुलढानामा दुर्घटनामा पर्दा २५ जनाको मृत्यु भएको छ ।


प्राप्त जानकारी अनुसार समृद्धि महामार्ग एक्सप्रेस वेमा बुलढाना नजिक बस पल्टिँदा ठूलो आगो लागेको थियो । बुलढाना प्रहरीका सहायक प्रहरी उपरीक्षक बाबुराव महामुनीका अनुसार बसमा ३३ जना सवार थिए । जसमध्ये २५ जनाको आगलागीका कारण घटनास्थलमा नै  मृत्यु भएको छ । सोही क्रममा अन्य व्यक्तिलाई अस्पतालमा भर्ना गरिएको छ ।

बुलढाना प्रहरीका डिएसपी बाबुराव महामुनीले यसबारे जानकारी दिएका छन् । घटना शुक्रवार राति करिब २ बजे भएको उनले बताए । बसबाट २५ जनाको शव निकालिएको छ । बसमा जम्मा ३२ जना सवार थिए । छ देखि आठ जना घाइते भएका छन् । घाइतेहरूको बुलढाना सिभिल अस्पतालमा उपचार भइरहेको छ

यसैबीच, बुलढाना प्रहरीका अनुसार बसमा ३३ जना सवार थिए, जसमध्ये २५ जनाको मृत्यु भएको र ८ जना घाइते भएको पुष्टि भएकाे छ। बसका चालक पनि बाँच्न सफल भएका छन् । चालकका अनुसार अचानक बसको टायर पड्के पछि बस पल्टिन गएको र त्यसैबीचमा आगलागी सुरु भएको थियो ।

प्रत्यक्षदर्शीहरूले नागपुरबाट औरंगाबाद जाने बाटोमा दायाँ पट्टि रहेको फलामको पोलमा  बस ठोक्किएको बताएका छन्। त्यसपछि चालकले सन्तुलन गुमाए । सो क्रममा बस सडकको बीचमा बनेको कंक्रीट डिभाइडरसँग ठोक्किएर पल्टिएको थियो ।

यसरी पल्टिएको बसले जमिनमा ढोका थिचेका कारण सो  ढोका खोल्न नसकेर यात्रुहरूको बसभित्रै जलेर मृत्यु भएको प्रत्यक्षदर्शीहरुले जानकारी दिएका छन् ।

यस्तो अवस्थामा गाडीमा सवार यात्रुहरू गाडीबाट बाहिर निस्कन पाएका छैनन् । दुर्घटनाका क्रममा बसबाट ठूलो मात्रामा डिजेल सडकमा फैलिएको पनि बताइएको छ । डिजेल चुहावटका कारण बसमा आगलागी भएको जनाइएको छ ।