FLASH NEWS

निर्वाचित भएको एक सय दिनको अवसरमा रवि लामिछानेले गरे विशेष कार्यक्रम घोषणा


नेपाल आवाज १७ श्रावण २०८०, बुधबार २०:३८ मा प्रकाशित १५४९ पाठक संख्या

चितवन – राष्ट्रिय स्वतन्त्र पार्टीका सभापति रवि लामिछानेले आफू निर्वाचित भएको एक सय दिनको अवसरमा आफ्नो क्षेत्रका लागि विशेष कार्यक्रम सार्वजनिक गरेका छन्। उनले एक कार्यक्रमकाबीच निर्वाचन क्षेत्र विशेष कार्यक्रमको घोषणा गरेका हुन्।


घोषणा गरिएका कार्यक्रममा महिलाका लागि एउटा बस आफ्नो निर्वाचन क्षेत्रमा आजैबाट निःशुल्क सञ्चालन गरेका छन्। पार्टीको झण्डामा प्रयोग भएको रंग निलो बस भएकाले बसलाई ‘ब्लु बस’ भनिएको छ।

बसमा महिलामात्र सवार गर्न सक्नेछन्। बस चितवन क्षेत्र नं २ का सहरी क्षेत्रमा सञ्चालनमा आउने छ। बस चढ्नेहरूका लागि कार्ड वितरण गरिनेछ। बसभित्र महिलाका लागि अत्यावश्यक सामग्रीसँगै सांसद लामिछानेलाई चिठ्ठी राख्ने ठाउँको व्यवस्था हुनेछ। लामिछानेले निर्वाचनको समयमा घोषणा गरेको विदेशमा रहेका एक सय जनालाई नेपालमा रोजगारीको घोषणा गरेका छन्। उनीहरूलाई मासिक ४० हजारदेखि एक लाख ५० हजारसम्मको तलबको व्यवस्था हुनेछ।

लामिछानेले हरेक चार-चार महिनामा सार्वजनिक सुनुवाइ गर्ने भन्दै पहिलो कार्यक्रम आगामी भदौ १० गतेका लागि घोषणा गरेका छन्। ६५ वर्ष माथिका ज्येष्ठ नागरिकलाई लक्षित गर्दै मोबाइल क्लिनिक सञ्चालनमा ल्याइएको छ। त्यसमा मेडिकल अधिकृतसहितको स्वास्थ्यकर्मीको समूहले घरमा नै पुगेर सेवा दिने छ। थप उपचार आवश्यक परेमा परामर्श गरी अस्पताल पठाउने व्यवस्था मिलाइने भएको छ।

उनले स्वास्थ्य चितवन अभियानअन्तर्गत आफ्नो क्षेत्रका विपन्न नागरिकलाई पाँच लाख बराबरको स्वास्थ्य बीमा कार्यक्रम सुरु गरिने बताए। पहिलो चरणमा एक सय जनालाई समावेश गरिने छ।

लामिछानेले पहिलो चरणमा दुई विद्यालयका कक्षा ११ र १२ लाई नमुना विद्यालयका रूपमा विकास गर्ने बताए। भरतपुर महानगरपालिकाको रामनगर मावि र कालिका नगरपालिकाको चतुर्मुखी माध्यामिक विद्यालयका कक्षा ११ र १२ का विद्यार्थीलाई पहिलो चरणमा उत्कृष्ठ शिक्षा दिएर ती दुई विद्यालय नमुना बनाइने छ। यससँगै अन्य कक्षा र अरु विद्यालय नमुना बनाउँदै लगिने छ। उनले इच्छाकामनाको भारांको आधारभूत विद्यालयलाई नमुना शैक्षिक संस्थाका रुपमा विकास गरी आवासीय विद्यालय बनाउन सुरु गरिएको जानकारी दिए।

कार्यक्रमको घोषणाका क्रममा नारायणगढ-मुग्लिन सडकमा वर्षातको समयमा यात्रुले दुःख पाउने गरेको भन्दै उनले २० जनाको स्वयमसेवी समूह (आरएटि) परिचालन गरिने बताए। वर्षातको समयमा मात्र यो र्‍यापिट एक्सन टिम परिचालन हुने छ। उनकै कार्यक्रममा आफूले प्राप्त गरेको मत ५४ हजार एक सय ७४ बराबर फलफूल र अन्यका बिरुवा निर्वाचन क्षेत्रमा रोपिने जनाइएको छ। मतदाताको सम्मानमा ‘एक मत एक बिरुवा’ रोप्न लागिएको हो। कार्यक्रमका लागि आवश्यक बजेट जुटाउन चितवन क्लब गठन गरिने छ।

क्लबमा विदेशमा रहेका चितवनवासीलाई समावेश गरेर आर्थिक सहयोग जुटाइने उनले बताए। लामिछानेले आजै भरतपुरको बसेनीमा सम्पर्क कार्यालय स्थापना गरेका छन्। कार्यालयमा प्रमुख कार्यकारी अधिकृतका रूपमा हेमन्त बराललाई नियुक्त गरिएको छ। कार्यालयको लामिछानेसहित पार्टीका नेताले घण्टी बजाएर उद्घाटन गरे। लामिछाने पहिलोपटक निर्वाचित भएपछि नागरिकताको विवादका कारण सर्वोच्चको फैसलासँगै पद रिक्त भएको थियो। उपनिर्वाचन भएर दोस्रो पटक निर्वाचित भएको आज एक सय दिन पुगेको हो।