आज: | Sat, 27, Jul, 2024
१०५७ पाठक संख्या
हेटौंडा – त्रिभुवन आर्मी फुटबल क्लब छैटौं बागमती गोल्डकप फुटबल प्रतियोगिताको सेमिफाइनलमा पुगेको छ । आइतबार अन्तिम क्वाटरफाइनलमा आयोजक बागमती खेलकुद विकास समितिलाई ४–० ले हराउँदै आर्मी अन्तिम चारमा पुगेको हो ।
बागमती–८ स्थित जनता माविको खेल मैदानमा आर्मीलाई जित दिलाउन जिलेस्पी जंग कार्की, रास बुढा मगर, फत्तेमान घलेले र कमल थापाले गोल गरेका थिए ।
२६ औं मिनेटमा जिलेस्पीको गोलबाट आर्मीले अग्रता बनाएको थियो । रासले ५३ औं मिनेटमा गोल गरे । फत्तेमानले ६३ औं र कमलले ७५ औं मिनेटमा गोल गरेपछि आर्मीको सहज जित भएको थियो ।
म्यान अफ दी म्याच चुनिएका फत्तेमानले १० हजार रुपैयाँ प्राप्त गरे ।
आर्मीले सेमिफाइनलमा अर्को विभागिय टोली नेपाल एपिएफ फुटबल क्लबको सामना गर्नेछ ।
प्रतियोगितामा सोमबार हुने पहिलो सेमिफाइनलमा मछिन्द्र फुटबल क्लब र एनआरटीबीच प्रतिस्पर्धा हुनेछ ।
प्रतियोगिताको विजेताले १० लाख र दोस्रो हुने टोलीले ५ लाख रुपैयाँ प्राप्त गर्नेछ ।
